پنجاب اٹ گچین کاری 30 اپریل آ مریک، صدر منظوری تس

اسلام آباد: صدر مملکت ڈاکٹر عارف علوی پنجاب نا گچین کاری تیکن 30 اپریل نا تاریخ نا منظوری ءِ تس۔ صدر مملکت پنجاب اٹ گچین کاری تیکن الیکشن کمیشن نا کنڈآن سلاہ تروک تاریخ تیا سجفنگ آن پد 30 اپریل نا تاریخ نا منظوری تسنے۔ الیکشن کمیشن صدر مملکت ءِ پنجاب اٹ گچین کاری تیکن 30 اپریل آن 7 مئی اسکان نا تاریخ سلاہ تسوسس۔ الیکشن کمیشن سپریم کورٹ نا پرمان نا رد اٹ صدر مملکت و گورنر کے پی آ چٹھی راہی کریسس ہراٹی کے پی کے ٹی گچین کاری تیکن گورنر آن ورندی بٹنگ انگاسس۔ الیکشن کمیشن سپریم کورٹ آف پاکستان نا فیصلہ ءِ مون آتخسا صدر مملکت ءِ چٹھی اس مون تسنے ہراٹی صوبہ پنجاب اٹی گچین کاری تا اڈتننگ کن 30 اپریل آن 7 مئی 2023اسکان نا تاریخی آتے سلاہ کننگانے۔ جمعہ نادے آ الیکشن کمیشن آف پاکستان آن جاری بیان نا رداٹ چیف الیکشن کمشنر سکندر سلطان راجہ نا کماشی ٹی الیکشن کمیشن نا دیوان اس اڈ ہلک ہراٹی شرفمند آ الیکشن کمیشن نا باسک آتیان بیدس الیکشن کمیشن نا سینئر آفیسر آک بشخ ہلکر۔ الیکشن کمیشن سپریم کورٹ آف پاکستان نا فیصلہ ءِ مون آ تخسا صدر مملکت ءِ چٹھی اس مون تسنے ہراٹی صوبہ پنجاب نا گچین کاری تا اڈتننگ کن 30 اپریل آن 7 مئی 2023اسکان نا تاریخ آتا سلاہ کرینے۔ صدر مملکت نا کنڈآن تاریخ نا گچینی آن پد الیکشن کمیشن تینا آئینی و کانودی فرض ءِ سرتننگ کن تیار ءِ۔ الیکشن کمیشن گورنر خیبرپختونخوا ءِ ہم مراسلہ اس گدریفینے، ہراٹی نوشتہ کننگانے کہ سپریم کورٹ آف پاکستان نا پرمان تے مون آ تخسا الیکشن کمیشن نا ورندی نا چاری ءِ۔ پاکستان تحریک انصاف نا راہشون فواد چوہدری پارینے کہ الیکشن کمیشن نا کنڈآن صدرِ مملکت ءِ پنجاب اٹ گچین کاری تیکن سلاہ تننگ نا ستا ءِ کینہ‘ دا ملک ملک، آئین و تحریک انصاف نا بھلو سرسہبی اسے۔ سوشل میڈیا غا الیکشن کمیشن نا گام گیج آتیا ویڈیو کلہو اٹ فواد چوہدری پارے کہ الیکشن کمیشن صدرِ پاکستان ءِ پنجاب اٹ گچین کاری کرفنگ نا بابت سلاہ تس۔ پی ٹی آئی نا راہشون پارے کہ الیکشن کمیشن نا دا گام انا ستاءِ کینہ۔ اوپارے کہ سپریم کورٹ نا پرمان نا رد اٹ الیکشن کمیشن سہی ءُ گام اس ہرفینے۔ فواد چوہدری پارے کہ روچہ مبارک وچنکا عئید انا رد اٹ الیکشن کمیشن جوان ءُ گام اس ہرفینے۔ تحریک انصاف نا راہشون پارے کہ گچین کاری تا تاریخ نا پک فیصلہ ءِ صدرمملکت ءِ کروئی ءِ۔ اوپارے کہ مچ آقوم ءِ دا باندات آ مبارکبادی ایتوہ۔ دا ملک، آئین و تحریک انصاف نا بھلو سرسہبی اسے۔

(آن لائن/ اے پی پی)