زمیندار تا ویل آن مہالو ہم بنجا ءِ معلومدار کریسن، ضیاء لانگو

کوئٹہ : صوبائی وزیرداخلہ میرضیاء اللہ لانگو پارینے کہ بلوچستان نا زمیندارک بجلی نا لوڈ شیڈنگ نا بابت ہرا برانزءِ کریر دا ویل آ کیہی وار بنجائی حکومت تون اوڑدہی کرینٹ‘ باوری کرفنگ آن پد ہم بجلی نا بجلی ہندن سلوک ءِ‘ بجلی نا دا وڑ انا لوڈ شیڈنگ کننگ آن بلوچستان نا مخلوق تون بیدادی کننگ انگ ءِ انتئے کہ دا جاگہ نا زرگزران کشت وکشار تون گنڈوک ءِ۔ بنجائی حکومت خاص وڑ ٹ بنجائی وزیر دیر وبجلی دا ویل ءِ زوت ایسر کے و بنجائی وزیرمملکت دیر وبجلی نا تعلقدار بلوچستان آن مننگ تون اوار اسہ قوم پرست جماعت اسے آن ءِ بایدے او ہم بجلی ناویل ءِ ایسر کننگ کن تینا کڑدار ءِ ادا کے۔ دا خیال آتا درشانی ءِ او تینا جاری کروک بیان اٹ کرے او پارے کہ زمیندار آتا برانز اوفتا حق ءِ بجلی نا لوڈشیڈنگ نا ویل آتیا کیہی وار توار چست کرینٹ نن تینا زمیندار ایلم تتون سلوک ان‘ اوفتے تنیا الیپنہ۔ وزیراعلیٰ بلوچستان عبدالقدوس بزنجو ہم داباندات نا نوٹس ءِ ہلسا پرنسپل سیکرٹری ءِ زمیندار و کیسکو کمامدار آتتون تولسا ویل ءِ ایسر کننگ ناپرمان کرینے ہراکان گڈ کمامدار آک ہم بجلی نا ویل ءِ ایسر کننگ نا باور کرفینو۔ اوپارے کہ بلوچستان نا زیات مخلوق نا زرگزران کشت وکشار ءِ‘ بجلی نا لوڈشیڈنگ نا سوب آن دا بشخ بھاز زہمی مننگ اٹی ءِ‘ بجلی نا لوڈشیڈنگ کرسا دا جاگہ ناالس تون بے انصافی کننگ انگ ءِ۔ اوپارے کہ وزیراعظم میاں محمد شہباز شریف، بنجائی وزیر دیر وبجلی آن خواست کینہ کہ بلوچستان اٹ بجلی نا ویل ءِ دمدستی ایسر کننگے تاکہ کشت وکشار نا بشخ بھسکاری آن بچنگ کے وخت اس کہ بنجائی وزیر مملکت دیر وبجلی نا تعلقداری قوم پرست جماعت آن ءِ و بلوچستان نا فرزند ءِ بایدے او ہم دا ویل آ محکمہ توانائی وبجلی آ زور شاغسا تینا کڑدار ءِ ادا کے‘ تاکہ بلوچستان نا بجلی ناویل ایسر مرے۔ او پارے کہ بجلی نا لوڈشیڈنگ نا بابت ہچ چپ تولپنہ‘ ہر فورم آ دا ویل آ توار چست کرینن و مدام توار چست کرسا کینہ۔

(خ ن)