کیو اے یونیورسٹی واقعہ بلوچ تعلیم دشمنی اسے، قلات اسٹوڈنٹس فورم

قلات :طالبعلم آتیا جلہو یونیورسٹی انتظامیہ نا کارکڑد آ سوج اسے۔ قلات اسٹوڈنٹس فورم نا ترجمان تینا بیان اسے ٹی پارینے کہ قائد اعظم یونیورسٹی اسلام آباد اٹ بلوچ طالبعلم آتیا جلہو یونیورسٹی انتظامیہ نا لائخی آسوج اسے۔ ترجمان دا اُست ہسون آ کاریم ءِ بلوچ تعلیم دشمنی نا اسہ سوچوک ءُ ڈٹ اس پن کرسا پارینے کہ ہراڑے ملک انا دارالحکومت اٹ ہم بلوچ طالبعلم آک رکھوک افس تو ملک انا ایلو جاگہ غاتیا امر پرامن رہنگسا تعلیم دوئی کننگ کیرہ۔ یات سلے کہ تدوک آ دے پاکستان نا دارالحکومت اسلام آباد اٹ ساڑی ملک انا کل آن بھلا  تعلیمی ادارہ و جامعہ قائد اعظم یونیورسٹی اٹی ہزار آن زیات پشتون آک ملسا پنجاہ نا کچ اٹ ساڑی 50 بلوچ طالبعلم آک لٹ و ڈنڈا تیٹی جلہو کریسر۔ ہراٹی بلوچ طالبعلم آتے بھلو جانی نسخان اس رسینگا۔ ترجمان اُست ہسونی نا درشانی ءِ کرسا پارینے کہ جلہو یونیورسٹی نا تہٹی پیشن نا بندغ آتا کمک اٹ کننگا۔ ولدا ہم یونیورسٹی انتظامیہ طلباء  نا رکھ ءِ کننگ و پرامن ءُ چاگڑد اس جوڑ کننگ اٹ بے سہب مسنے۔  ترجمان دا واقعہ نا سخت انگا لوز آتیٹی مذمت ءِ کرسا پارینے کہ یونیورسٹی انتظامیہ و حکومتی کمامدار بلوچ طالبعلم آتا نسخان نا زوت اس پوروی کن اوفتے طبی آسراتی فراوان کننگے۔ داڑان بیدس بروک آ دے تیٹی بلوچ طالبعلم آتا رکھ انا ذمہ ہلے۔ ترجمان مستی پارینے کہ مچ آ ملک اٹ بلوچ طالبعلم آتیا داوڑ نا شیطانی و تعلیم دشمن انگا واقعہ غاتے توننگے وخت اس طالبعم آک روڈ آتیا بننگ آ مجبور مریرہ۔

(پ ر)