کابینہ دیوان، گچین کاری تا بابت سرجم فیصلہ کن ہُننگ آ امنا

اسلام آباد : بنجائی کابینہ پنجاب و خیبر پختونخوا نا گچین کاری تا بابت سپریم کورٹ نا سرجم فیصلہ نا بننگ آن پد حکمت عملی تینائی کننگ آ امنا کرینے و تینا دوارہ عزم کرسا پارے کہ زرگزرانی سوگوی سیاسی سوگوی گنڈوک ءِ‘ کل آ ادارہ غاتا احترام کننگ لازم ءِ‘ ملک ہچ ءُ بے چیٹی اس سگنگ کپک۔ وزیر خزانہ اسحاق ڈار ملکی زرگزران و آئی ایم ایف ورچوئل مذاکرات آ شریدار آتے سلاہ اٹ ہلک وخت اس کہ دیوان نا شریدار آک ڈالر نا نہاد نا ودکی آگڑتی درشان کریر۔ پنچ شنبے نا دے وزیراعظم شہباز شریف ناکماشی ٹی وزیراعظم ہاؤس اٹ بنجائی کابینہ نا دیوان اڈ ہلک ہراٹی پنچ ٹکی ایجنڈا غا سجفنگا‘ دیوان اٹ ملک انا جم سیاسی و زرگزرانی حالیت آتا جاچ ءِ ہلنگا‘ بنجائی کابینہ نا دیوان ءِ سپریم کورٹ نا فیصلہ نا رد اٹ بریفنگ تننگا‘ حکومت نا کنڈآن بنجائی وزیر کانود اہم آئینی و کانودی ٹک آتا بارو اٹ آگاہ کرے‘ فیصلہ تون اختلافی نوٹ انا بابت ہم بنجائی کابینہ نا باسک آتے بریفنگ تننگا‘ شریدارآک سپریم کورٹ نا سرجم فیصلہ جاری مننگ آن پد تینا حکومت عملی تینائی کننگ آ امنا کریر‘ کابینہ عزم کرے کہ زرگزرانی سوگوی سیاسی سوگوی تون گنڈوک ءِ‘ادارہ غاتے شرف تننگ کل آ لازم ءِ‘ ملک ہچ ءُ بے چیٹی اس سگنگ کپک‘ زرگزران نا گچینی کن کل اسٹیک ہولڈر آتے اسیجائی اٹ مونی گام کروئی مریک‘ دیوان اٹ وزیرخزانہ اسحاق ڈار ملکی زرگزران و آئی ایم ایف تون اینو ورچوئل مذاکرات نا بارو اٹ آگاہ کرے و پارے کہ آئی ایم ایف معاہدہ غان زرگزران ءِ سیبو رسینگک‘ دیوان اٹ ڈالر نا پد ریسہ ودوک آ نہاد آ گڑتی درشان کننگا۔ وزیراعظم توانائی نا ڈٹ آتے زور پورو کننگ نا پارت کرے وخت اس کہ بنجائی کابینہ نا بدل گیگ توانائی نا ڈٹ آتے مونی دننگ آ زور شاغا،کابینہ بجلی دزی نا توننگ نا گام گیج آتے ترند کننگ نا سلاہ تس‘دیوان اٹ پاور ڈویژن بجلی بریک ڈاؤن نا بارواٹ بریفنگ تس‘ توانائی بچت پروگرم و کفایت شعاری آ شریدار آتے سلاہ اٹ ہلنگا‘ بنجائی کابینہ اقتصادی کمیٹی نا فیصلہ غاتے پک کرے‘ دیوان اٹ پاور بریک ڈاؤن نا انکوائری رپورٹ پیش کننگا‘رپورٹ اٹ پاننگانے کہ 23 جنوری نا بریک ڈاؤن آ 18 پنہ غا ساڑی رپورٹ ءِ کابینہ ٹی پیش کننگا‘رپورٹ اٹ این ٹی ڈی سی، نیپرا و پاور کنٹرول مینجمنٹ و شفٹ انچارج ءِ زموار گوندنگانے، وزیراعظم پدریسہ 3 بریک ڈاؤن آ ترند مرسا پارے کہ پاور منسٹری جم پلان جوڑ کننگ نا پارت ہم کرے تاکہ آخبت اٹ دا وڑ انا واقعہ غاتیان بچنگ مرے، وزیراعظم سسٹم نا گچینی کن ہلہلہ ئی گام گیج کننگ نا پارت ہم کرے وخت اس کہ مصدق ملک و اونا کمیٹی نا مسہ باسک ءِ جاست پاستی رپورٹ جوڑ کننگ آ شاباسی ہم تس‘ کابینہ زموار افسر و کارندہ غاتا برخلاف محکمانہ کارروائی کننگ نا منظوری تس۔

(آن لائن)