بلوچ کلچر روایت و کانڈا غا شرفمندی تا اواری اسے، جان جمالی

کوئٹہ : قائم مقام گورنر بلوچستان میر جان محمد جمالی بلوچ کلچر ڈے آ بلوچ قوم ءِ مبارکبادی ترسا پارینے کہ بلوچ کلچر روایت و کانڈا غا شرفمندی تا اواری اسے،۔ قائم مقام گورنر بلوچستان بلوچ کلچر ڈے انا وخت آ جاری کروک بیان اٹی پارے کہ بلوچ کلچر روایت و کانڈا غا شرفمندی تا اواری اسے،۔ اوپارے کہ ایلمی، رواداری و انسان سنگتی بلوچ کلچر نا سوگو اسیجائی قدر آک ءُ ہرافتے برقرار تخنگ و اوفتے پوسکن آ قول انا خواست آتا رداٹ شاغنگ نا سخت گرج ءِ۔ بلوچ دودوربیدگ تینا تہہ ٹی اسہ تخلیقی قوت اس تخک و بلوچ کلچر تینا گردوپیش نا ایلو غٹ دودوربیدگی اکائی اتون اسٹی، ہم گرنچی و رواداری نا علمبردار ءِ۔ قائم مقام گورنر بلوچستان ورناچین آ زور شاغا کہ او کلچر ڈے ءِ تعمیری و روایتی قدر آتیان فائدہ ہرفسا راج ءِ امن، ہم گرنچی، ایلمی نا بناو آ مون آ دننگ اٹ فعال کڑد ادا کیر۔ داکان بیدس قائم مقام گورنر بلوچستان میر جان محمد جمالی پارینے کہ سبی شار تاریخی وڑاٹ ڈیہہ ٹی پیڑی تیان پشتون و بلوچ خانہ بدوش قبیلہ غاتیکن اہم واپاری، دودوربیدگی و زرگزرانی سرجزآتا ہند مسنے، قائم مقام گورنر بلوچستان میر جان محمد جمالی سالانہ سبی میلہ 2023نا وخت آ جاری کلہواٹی پارے کہ سبی شار تاریخی وڑاٹ ڈیہہ ٹی پیڑی تیان آباد چندی قوم خاص وڑاٹ پشتون و بلوچ خانہ بدوش قبیلہ غاتیکن اہم واپاری، دودوربیدگی وزرگزرانی سرجز آتا اہم ہند مسنے۔ اوپارے کہ سبی دربار سلابت نا بابت ہم سبی اسہ تاریخی و روایتی اہمیت تخک و ہروارآنبار دا سال ہم سبی میلہ ءِ روایتی جم و جوزہ اٹ اڈتننگ انگ ءِ۔ اوپارے کہ میلہ نا توسط اٹ مخلوق ءِ گچین سیل و سواتی سرجزآتا وارخواہی دوئی مریک۔ قائم مقام گورنر بلوچستان پارے کہ سبی میلہ صوبہ نا راجی و دودوربیدگی زند انا ڈیک ءِ۔ اوپارے کہ سبی صوبہ نا تاریخ و تمدن نا وت ءِ۔ قائم مقام گورنر بلوچستان میلہ نا منتظمین آتے سبی میلہ نا شاندار بست و بند آ مبارکبادی پیش کرے۔

(اے پی پی)