پاکستان نا مقبوضہ کشمیر اٹی بھارتی بیدادی تا بابت گڑتی نا درشانی

اسلام آباد : ترجمان دفترخارجہ ممتاز زہرہ بلوچ پارینے کہ اٹلی و لیبیا ٹی کشتی شکست آتیٹی 9 پاکستانی شاری زوال کرینو ہرافتا میت آتا وطن آ پدی اتنگ کن گام گیج کننگ انگ ءِ، تدوک آ تُو بھارتی فوجیک زیر حراست پنچ کشمیری تے شہید کریر، 4 ہزار آن زیات کشمیری بھارت و بھارت نا غیرکانودی کوزہ ٹی جموں وکشمیر نا چندی زندان تیٹی نظربند ءُ، پاکستان بھارت نا غیرکانودی کوزہ ٹی جموں وکشمیر اٹی انسانی حق انا بھلا خلاف ورزی تا برخلاف توار بڑز کرسا کیک، وزیرخارجہ 10 مارچ آ نیویارک اٹی اسلاموفوبیا نا بابت اسہ دود اسے ٹی بشخ ہلیک، جرمنی نا وزیر مملکت خارجہ امور ڈاکٹر ٹوبیاس لنڈنر4 آن 7 مارچ اسکان پاکستان نا دورہ ءِ کیک۔ داخیال آتا درشانی ءِ او پنچ شنبے نادے آ ہفتہ وار حوال اٹی کرے۔ اوپارے کہ 26 جنوری 2023آ اٹلی نا کرک آ چپی مروک آ کشتی نا ساڑی آ است ہسون واقعہ ٹی اِرا پاکستانی شاری تینا جون تیان دوتے سلار وخت اس کہ 17 پاکستانی ءِ بچفنگانے ولے 2 بندغ داسکان بے گوا ءُ۔ روم اٹی ننا سفارت خانہ اطالوی کمامدارآتون شکست اٹی زندہ بچوک آتا خیالداری و میت آتا پاکستان آ گدریفنگ کن گام گیج کننگ ءِ۔ اوپارے کہ اسہ پین است ہسون واقعہ اسے ٹی لیبیا نا شار بن غازی نا خڑک کشتی اسے نا شکست اٹی داتم اسکان 7 پاکستانی شاری زوال کرینو۔ لیبیا ٹی پاکستانی سفارت خانہ ہندی کمامدار و ریڈکراس نا جہانی کمیٹی نا کمک اٹ لاش آتا درستی راستی و میت آتا پاکستان آ گدریفنگ نا عمل اٹ آسراتی فراوان کننگ اٹی ءِ۔ سفارت خانہ و وزارت خارجہ ہم زوال کروک آ بندغ آتا خاہوت آتون رابطہ ٹی ءُ۔ اوپارے کہ وزیر مملکت خارجہ امور حنا ربانی کھر جنیوا ٹی اڈ ہلوک سلہہ غاتا چٹفنگ کانفرنس نا بڑزکو کہولی دیوان اٹی بشخ ہلک۔ تینا ویڈیو کلہو اٹی اوجہانی وعلاقائی سلامتی کن ساڑی و مون آ بروک خطرہ غاتون مون تننگ نا اہمیت نا بارواٹی ہیت کرے۔ وزیر مملکت جہانی کہول آ امنائی اصول آتا بنداو آ پرامن ہمسائیگی کن پاکستان نا وژن و پالیسی نا خاکہ اس پیش کرے۔ حنا ربانی کھر جنیواٹی اڈ ہلوک آ انسانی حق کونسل نا 52 می دیوان نا بڑزکو کہولی بشخ اٹی ہم عملی وڑاٹ بشخ ہلک ہراٹی او انسانی حق انا مون آ دننگ و رکھ اکن پاکستان نا پورو عزم انا درشانی ءِ کرے و شون پسند کانود نا نفاذ، و اونا نفاذ ءِ گچین کننگ، ادارہ جاتی کمکاری ءِ اپ گریڈ کننگ، و پارلیمانی و عدالتی چاروکی ءِ سوگو ترسا تینا ملکی انسانی حق انا پنجر ءِ سوگو کننگ کن پاکستان نا کوشست آتا خاکہ اس پیش کرے۔ وزیر مملکت بھارت نا غیرکانودی کوزہ ٹی جموں وکشمیر اٹی انسانی حق انا حالیت آتیا جہانی چکار ءِ کرفے، علاقہ ٹی کشمیری تا حق انا رکھ آ زور شاغا و انسانی حق انا ہائی کمشنر آ زور شاغا کہ او مقبوضہ دامان اٹی انسانی حق انا بھلا حالیت آتا بابت تازہ ءُ رپورٹ اس پیش کے و داکونسل ءِ دابارواٹ معلومدار کے۔ اوپاکستان نا کنڈآن یورپ اٹی قرآن پاک نا بے حرمتی نا ساڑی آ واقعہ نا ترندی اٹ مذمت ءِ کرے و ودوک آ اسلاموفوبیا نا بارواٹی تینا گڑتی تا درشانی ءِ کرے و رزاک اٹ خار و بیدادی آ ہُشکا تروک بنداوی سوب آتون مون تننگ آ زور شاغا۔ ترجمان دفترخارجہ پارے کہ وزیر اقتصادی امور ڈویژن ایاز صادق، کوویڈ۔ 19 آن پد جہانی بحالی آ غیر وابستہ تحریک (این اے ایم) نا رابطہ گروپ نا سروکی دیوان اٹی پاکستانی ڈل انا کماشی ءِ کننگ اٹی ءِ۔ سروکی دیوان، ہرا 1 یکم آن 3 مارچ اسکان برجاسلک۔

(اے پی پی)