گوادر بندرگاہ نا کمک اٹ روس آن خولم بننگ نا بنا

گوادر : روس آن بحری جہاز خولم نا بھلو کچ اسے اتسا گوادر پورٹ آ سر مس‘ خولم نا برآمد کننگ آن پاکستان اٹ نت انا تنکی نا مون ءِ توننگ مریک‘ معاہدہ نا رد اٹ 9بحری جہاز نا کمک اٹ جم وڑ اٹ 450,000 میٹرک ٹن خولم درآمد کننگک و دا رد اٹ اولیکو بحری جہاز ایم وی لیلا چنئی 50,000 میٹرک ٹن خولم اتسا گوادر بندرگاہ غا سرمسنے‘ خولم نا درآمد، ان لوڈنگ، سٹوریج و اونا سر کننگ کن چائنا اوورسیز پورٹس ہولڈنگ کمپنی، ٹریڈنگ کارپوریشن آف پاکستان، پاکستان ایگریکلچرل سٹوریج اینڈ سروسز کارپوریشن لمیٹڈ، پاکستان کسٹمز اور نیشنل لاجسٹکس سیل تینا کڑدار ءِ ادا کیرہ ہراڑکن کل بست وبند آک مہالو آن پورو کننگانو۔ ٹریڈنگ کارپوریشن آف پاکستان و گوادر انٹرنیشنل ٹرمینل لمیٹڈ نا نیام اٹ پک کروک معاہدہ نا رد اٹ گوادر بندرگاہ نا کمک اٹ روس آن 450,000 میٹرک ٹن خولم درآمد کننگک۔ گوادر پورٹ اتھارٹی نا چیئرمین پسند خان بلیدی پارے کہ وزارت نیشنل فوڈ سکیورٹی اینڈ ریسرچ 30 نومبر 2022 آ خولم درآمد کننگ کن ٹینڈر کننگاسس‘ 7 میکو جہانی ٹینڈر و جی ٹو جی پیشکش نا نتیجہ غاتے مون آتخسا اقتصادی رابطہ کمیٹی روسی کمپنی پروڈنٹروج نا کنڈآن تروک کل آن کم بولی نا منظوری ءِ تس۔کمپنی نا کنڈآن جی ٹو جی 372ڈالر فی میٹرک ٹن نا بولی تننگا وخت اس کہ معاہدہ نا رد اٹ 450,000 میٹرک ٹن خولم نا درآمدی آپریشن 2 مارچ آن 31 مارچ 2023 اسکان مریک۔ معاہدہ نا رد اٹ گوادر بندر گاہ غان ملک اٹ مروک خڑچ آتے پاسکو ایتک ہرافتے خولم نا اسٹاک جاری کننگ ناوخت آ صوبہ غاتیان ہلنگک‘داخس بھلو کچ اسے ٹی خولم درآمد نا معاہدہ ڈیہہ اٹ اسہ لاجسٹک ہندجاٹ نا وڑ اٹ گوادر بندرگاہ نا فطری لائخی تا گچین مننگ نا کنڈآ اسہ بھلو پیش رفت اسے ہرا پاکستان نازرگزران اٹ جی ڈی پی ٹی 10 ارب ڈالر نا بشخ شاغک‘ او گوادر بندرگاہ غان خولم درآمد کننگ مزل نا نشان گوندسا پارے کہ خولم نا درآمد آن گوادر اٹ واپاری سرجز آک زیات مریرہ‘داڑان ہندی کہول آ روزگار نا لائخیک ہم ودرہ انتئے کہ ہراتم درآمد کروک خولم نا ان لوڈنگ، سٹوریج و سر کننگ کن سرجز آک بنا کیرہ تو داڑکن داڑے بھلو کچ اسے ٹی ہیلکار‘ نیم ہیلکار بندغ آتا گرج مریک۔ او پارے کہ گوادر بندرگاہ غان تدوک آ تُو سرسہبی اٹ یوریا ہم سرکننگانے و داسہ کل تعلقدار محکمہ غاتے ٹی بلوچستان اٹ اقتصادی سرجز آتے ودفنگ کن چندی ڈٹ آتیا عملدرآمد کننگ انگ ءِ۔

(آن لائن)