چین مدام پاکستان تون کمک کرینے، چینی وزارت خارجہ

بیجنگ : چینی وزارت خارجہ نا ترجمان ماؤ نینگ پریس کانفرنس اٹ پاکستان نا وام تا بابت اسہ سوج اسے نا ورندی ٹی پارینے کہ پاکستان چار مُد انا اسٹریٹجک پارٹنر و سوگو ءُ سنگت اسے۔ چین و پاکستان مدام اسٹ ایلو نا مخ تفی ءِ کرسا بسنو‘ پنچ شنبے نادے چینی میڈیا نا رد اٹ او پارے کہ چین مدام پاکستان تون زرگزرانی و مالی کمک کرینے تاکہ پاکستان نا زرگزران سوگو مرے‘ الس نا زندی آب گچین و ملک شونداری نا کسر آ روان مننگ کے۔ چینی وزارت خارجہ پارے کہ اسہ خاص شون ہلوک ملک اسے نا شدت پسند مالیاتی و زرگزرانی پالیسیک و اونا زہمک پاکستان تون اوار ایلو شونداری ناکنڈآ گام کروک ملک آتا مالی مشکل آتا بنداوی سوب آک ءُ‘ دیکی واپاری وام تروک و بھاز فائدہ ئی مالیاتی ادارہ‘ شون ناکنڈآ گام کروک آتا ملک آتے کل آن زیات وام تروک آک ءُ‘ ہندا سوب آن چین کل پڑک آتیا زور شاغک کہ او پاکستان نا اقتصادی وراجی سوگوی کن اسیجائی اٹ کاریم کیر‘ او پارے کہ شون ہلوک ملک آتا سخت زرگزرانی پالیسیک پاکستان کون آ ملک آتا زرگزرانی تنکی نا سوب ءُ۔ چینی وزارت خارجہ پارے کہ مالیاتی ادارہ وام تروک ملک آک پاکستان نا زرگزرانی حالیت آتے ٹی کمک کیر۔ ترجمان چینی وزارت خارجہ پارے کہ کل پارٹنر آک پاکستان کن مثبت کڑدار ادا کیر۔

(آن لائن)